महेन्द्रनगर– नेपालले सिरिज अन्तर्गत आज आफनो पाँचौ खेलमा दोस्रो जित निकालेको छ । बुधबार डार्विनको पाल्मेस्र्टोनमा काजालिस ऐरेनमा भएको खेलमा नेपालले मेलबर्न रेनेगाड्र्सलाई ३३ रनले हराएको छ ।
नेपालले दिएको १ सय ४० रनको लक्ष्य पछाएको मेलर्बनले निर्धारित २० ओभरमा सबै विकेट गुमाउदै १ सय ६ रन मात्र बनाउन सक्यो ।
मेलर्बनका लागि अर्जुन नैरले सर्वाधिक २६ रन बनाए । जे लेमियरले १८ रन जोडे । नेपालका तिब्र गतिका बलर सोमपाल कामी लयमा देखिए । उनले ४ ओभरमा १७ रनमा मात्रै खर्चेर ५ विकेट लिए । सोमपालले एक खेलाडी रन आउट पनि गरे ।
कुशल भुर्तेलले २ विकेट लिए । त्यस्तै, शहाब आलम र रुपेश सिंहले १–१ विकेट लिए ।
टस जितेर ब्याटिङ रोजेको नेपालले निर्धारित २० ओभरमा ९ विकेट गुमाउँदै १ सय ३९ रन बनाएको थियो । नेपालका लागि कुशल्ल मल्लले सर्वाधिक २९ रन बनाए । मल्लले १ चौका र १ छक्का प्रहार गरे ।
त्यस्तै, नेपालका ओपनर कुशल भुर्तेल १ रन बनाउँदा भिम सार्कीले १९ रन बनाए । आरिफ शेख १२, दिपेन्द्र सिंह ऐरि २७, गुल्शन झा २ र लोकेश बम २४ रन बनाएर आउट भए । नन्दन यादव १ रन तथा रुपेश सिंह १६ रन बनाउँदै नटआउट रहे ।
मेलर्बनका लागि र्गस ओनिल, लचलान बाङ्स, क्यालम स्टो र माइकल आर्चरले २–२ विकेट लिएका थिए ।
नेपालले खेलेको पाँच वटा खेलमा तीनमा हार र दुईमा जित हासिल गरेको छ ।
बुधबारको खेलमा कप्तानी दिपेन्द्र ऐरीले गरेका थिए । रोहित, सन्दिप र आसिफ खेलेका थिएनन ।
