महेन्द्रनगर– कञ्चनपुरको भीमदत्त नगरपालिका– १३ पिपरैया घाँटबाट अबैध ग्राभेल ओसार्ने बेदकोट नगरपालिकाको सुन्दरपुरस्थित श्री सिद्धनाथ उदयदेब अनमोल क्रेसरका टिप्परलाई जरिमाना तिराएर छाडिएको छ । त्यस्तै, अबैध ग्राभेल भीमदत्त नगरपालिकाले जफत गरेको छ ।
महाकालीबाट अबैध ग्राभेल ओसार्ने अनमोल क्रेसरका ६ वटा ग्राभेल सहितका टिप्पर शनिवार महेन्द्रनगरको बसपार्क नजिकबाट युवाहरुले नियन्त्रणमा लिएर प्रहरीलाई बुझाएका थिए । अनमोल क्रेसरका उक्त टिप्पर जिल्ला प्रहरी कार्यालयले शनिवार नै कानुनी कारवाहिका लागि भीमदत्त नगरपालिकालाई जिम्मा लगाएको थियो ।
आईतवार भीमदत्त नगरपालिकामा बसेको सरोकारवाला निकायको बैठकले पिपरैया घाटमा संकलन गरी राखेको नदिजन्य प्रदार्थ अबैध भएको ठहर गरेको भिमदत्त नगरपालिकाका सुचना अधिकारी हरिसिंह धामीले समयसीमालाई बताए । सुचना अधिकारी धामीका अनुसार अबैध ग्राभेल सहित नियन्त्रणमा लिईएका अनमोल क्रेसरका टिप्परबाट प्रति टिप्पर १२ हजारका दरले ७२ हजार जरिवाना र ती टिप्परमा रहेको ग्राभेल जफत गर्ने सहमति बैठकमा भएको छ ।
अनमोल क्रेसरले उठाउँदै आएको पिपरैया घाट नजिकै अबैध ग्राभेल सहित भीमदत्त नगरपालिका क्षेत्रभित्र जम्मा गरी राखिएको नदिजन्य प्रदार्थको परिणाम एकिन गरी कानुन बमोजिम प्रक्रियामा आउँन र राजश्व तिरेर तत्काल उँठाउन सात दिने सुचना समेत नगरपालिकाले जारी गरेको सुचना अधिकारी धामीले समयसीमालाई जानकारी दिए ।
दुई बर्षअघि देखि संकलन गरी राखिएको हजारौ घनमिटर अबैध नदिजन्य प्रदार्थ अनमोल क्रेसरले गतभदौ महिनादेखि धमाधम उठाउँदै आएको थियो । २०८२–८३ का लागि महाकाली नदी उत्खननको नयाँ ठेक्का सम्झौता पछि बल्ल अन्तिम समयमा आएर उक्त ग्राभेल भीमदत्त नगरपालिकाले अबैध भएको ठहर गरेको हो ।
