महेन्द्रनगर– आईसीसी टी–२० विश्वकप छनोटअन्तर्गत नेपाल आज (शुक्रबार) सुपर सिक्सको अन्तिम खेल खेल्दै छ । आज हुने सामोयाविरुद्धको खेल जितेर नेपाल टी–२० विश्वकप एसिया इस्ट प्यासिफिक छनोटको च्याम्पियन बन्ने दाउँमा छ ।
ओमानको अल एमिरेट क्रिकेट मैदानमा हुने खेल नेपाली समयअनुसार दिउँसो सवा ४ बजे सुरु हुनेछ । सन् २०२६ मा हुने टी–२० विश्वकपका लागि नेपाल यसअघि नै छनोट भइसकेको छ ।
आज सामोयालाई हराए अपराजित रहेर नेपाल विश्वकप खेल्नेछ । विश्वकपको एसिया इस्ट प्यासिफिक छनोट प्रतियोगिताबाट नेपालसहित ओमान र यूएई विश्वकपका लागि छनौट भइसकेका छन् ।
छनोट चरणका ४ खेलबाट ८ अंक बनाउँदै नेपाल शीर्ष स्थानमा छ । ५ खेलबाट ६ अंक जोडेको यूएई दोस्रो र ४ खेलबाट ६ अंक बनाएको ओमान तेस्रो स्थानमा छन् ।
यसअघिका चारै खेलमा पराजित सामोया सहित कतार र जापान भने छनोट चरणबाट बाहिरिएका छन ।
