ओमानमा जारी टी ट्वान्टी विश्वकप क्रिकेट छनौट खेलमा नेपालले जापानलाई पराजित गरेको छ । जापानलाई हराउँदै स्पष्ट २ अंक सहित नेपालले सुपर सिक्समा बलियो उपस्थिति जनाएको छ । शुक्रबार दिउँसो भएको समुह बी को खेलमा नेपालले जापानलाई ५ विकेटले हराएको छ । एक खेल अघि नै सुपर सिक्सको स्थान पक्का गरेका दुबै टोली २ अंकका लागि प्रतिष्पर्धा गरेका थिए ।
टस जितेर ब्याटिङमा निम्त्याएको नेपालले जापानलाई २० ओभरमा १३१ रनमा रोकेको थियो । पावर प्लेसम्म जापानलाई दबाबमा राखेपनि जापानका कप्तान र तेस्रो नम्बरका ब्याटरले खुलेर खेल्दै १३ ओभरमा ९७ रन सम्म एक विकेट मात्र गुमाएको थियो । नेपालको बलिङ निरिह बनिरहेको बेला प्लेयर अफ द म्याच जितेका गुल्सन झा ले जापानका कप्तानलाई आउट गरे । त्यसपछि जापानका ब्याटरहरु चल्न सकेनन् । जापानले पुरै ओभर खेलेर आठ विकेटको क्षतिमा एक सय ३१ रन बनाएको थियो ।

दिपेन्द्र सिह ऐरीले एक रन आउट मार्फत पहिले विकेट लिएका थिए । गुल्सन झा र सन्दिप लामिछानेले २–२ विकेट, सोमापाल कामी र नन्दन यादवले १–१ विकेट लिँदा २ जना रन आउट भएका थिए ।
एक सय ३२ रनको लक्ष्य लिएर मैदानमा उत्रेको नेपाली टोलीले पावर प्लेमा सम्हालिएर खेलेको थियो । कुशल भुर्तेलले क्याच आउट हुनुखघि २१ बलमा २१ रन, आसिफ शेखले २१ बलमा ३८ रन, कप्तान रोहित पौडेलले १९ बलमा १८ रन, सन्दिप जोरा ७ बलमा ५ रन, कुशल मल्ल ६ बलमा ४ रन बनाएर आउट भएका थिए । नट आउट फर्किएका दिपेन्द्र सिँह ऐरी १४ बलमा १४ रन तथा गुल्शन झा ले २० बलमा महत्वपुर्ण २८ रन बनाउँदै नेपाललाई १८ ओभरमै ५ विकेटको जीत सुनिश्चित गरेका थिए ।

समुह बी बाट नेपाल २ अंक र जापन अंक विहिन अवस्थामा सुपर सिक्समा छन् । समुह ए बाट सुपर सिक्समा यूएई २ अंक र कतार अंक विहिन अवस्थामा पुगेका छन । त्यसैगरी समुह सी बाट आयोजक ओमान २ अंक र सामोवा अंक विहिन अवस्थामा सुपरसिक्समा पुगेका छन् ।
सुपर सिक्समा नेपालको प्रतिस्पर्धा
अब सुपर सिक्समा नेपालले समुह ए का युएई र कतार तथा सी बाट आउने २ टोली सँग प्रतिस्पर्धा गर्नेछ । सबै टोलीले ४–४ खेल पश्चात सर्वाधिक अंक हुने ३ टोली आगामी जनवरी बाट भारत तथा श्रीलँकामा सुरु हुने टी–ट्वान्टी विश्वकप २०२६ मा खेल्न स्थान पक्का गर्नेछन् । सुपर सिक्समा नेपालको खेल तालिका यस प्रकार रहेको छः
पहिलो खेलः असोज २६ गते आइतबार ४ः१५ बजे विरुद्ध युएई
दोस्रो खेलः असोज २७ गते सोमबार राती ८ः४५ बजे विरुद्ध कतार
तेस्रो खेलः असोज २९ गते बुधबार राती ८ः४५ बजे विरुद्ध ओमान
चौथो खेलः असोज ३१ गते शुक्रबार दिउँसो ४ः१५ बजे विरुद्ध सामोवा


