महेन्द्रनगर– कञ्चनपुर सदरमुकाम महेन्द्रनगरमा जारी मिनि मनोरञ्जन तथा साँस्कृतिक मेला सर्त पालना गरी संचालन गर्न जिल्ला प्रशासन कार्यालय कञ्चनपुरले आयोजकलाई निर्देशन दिएको छ ।
श्रावण ९ गतेदेखि संचालन गरिएको मेला शान्ति सुरक्षा कायम गरी ब्यवस्थित रुपमा आयोजना गर्न जिल्ला प्रशासन कार्यालयले आयोजक तथा ब्यपस्थापकलाई पत्र मार्फत निर्देश गरेको हो ।
सुदूरपश्चिम समावेशी अपाङ्गता संघ कञ्चनपुरको आयोजना र भावना एम्युजमेन्ट प्रा.लि कैलालीको ब्यवस्थापनामा मेला आयोजना गरिएको हो । उक्त मेलामा साँस्कृति कार्यक्रम सहित होटल र बिभिन्न ब्यवसायीक गरी करिब ३० वटा स्टल रहेको आयोजकले जनाएको छ । विभिन्न खेल मनोरञ्नका सामाग्री पनि मेलामा राखिएको छ ।
सुरुमा आयोजकले श्रावण ५ गतेदेखि संचालन गर्ने गरी स्थानीय भिमदत्त नगरपालिकाबाट अनुमति लिएको थियो । तर, आयोजकले तयारी पुरा नभएको भन्दै चार दिनपछि श्रावण ९ गते मेला उद्घाटन गरेको थियो ।
श्रावण २९ गतेसम्म चल्ने भनिएको मिनि मनोरञ्जन तथा साँस्कृतिक मेला दिउसो ११ देखि राति ९ बजेसम्म संचालन हुने आयोजक र संयोजन कम्पनीले प्रचारप्रसार समेत गरेका थिए । तर, प्रशासनले अनुमति दिएन । राती ९ बजेसम्म मेला चलाउँदा शान्ति सुरक्षामा असर पर्ने भन्दै स्थानीय प्रशासनले रात्रीकालिन मेला संचालन गर्न रोक लगाएको हो । प्रशासनले साँझ ७ बजेसम्म पूर्णरुपमा मेला बन्द गरिसक्न भनेको छ ।
स्थानीय प्रशासनले मेला आयोजकलाई शान्ति सुरक्षा, अमनचयन, समाजीक सदभाव र अवाञ्छीत गतिविधि हुन नदिने गरी मेला संचालन गर्न भन्दै ८ बुदे निर्देशन सहितको पत्र काटेको छ । मेला आयोजना गर्दा कानून बमोजिम लाग्ने मनोरञ्जन कर लगायत प्रशासनिक शुल्क अनिवार्य असुल उपर गर्न गराउन जिल्ला प्रशासन कार्यालयले सम्बन्धित निकायलाई पत्राचार समेत गरेको छ ।
आयोजकले अक्षयकोष स्थापानार्थ पत्रकार महासंघ कञ्चनपुर शाखा र अपाङ्ग प्रवद्र्घन समाजलाई सहयोग गर्ने भनेको रकम सुनिश्चितता गर्न जिल्ला प्रशासनले पत्रमा भनेको छ ।
मेला आयोजकले पालना गर्नु पर्ने सर्त यस्ता छन !
१– मेला समापन पछि मेलास्थलको सरसफाई तथा फोहरमैला ब्यवस्थापन उचित ढंगबाट गर्ने, गराउने ।
२– स्वंयम सेवक परिचालन गरी मेलाको शान्ति सुरक्षा तथा सर्वसाधारणको अमनचयन, सामाजीक सदभाव कायम राख्ने, अवाञ्छीत गतिविधि हुन नदिने । त्यस्ता कृयाकलापको पूर्वानुमान गरी सर्तकताका साथ पूर्वतयारीमा रहने ।
३– नगद जित हार हुने गरिएका खेल पुर्णतः प्रतिबन्ध गर्ने, गराउने ।
४– लागु औषध तथा लागुपदार्थको कारोवार पुर्णतः बन्देज गर्ने, त्यस्ता पदार्थ सेवन गरी मेलास्थरमा आवतजावत तथा मनोरञ्जन गर्न पूर्णतया बन्देज गर्ने । त्यस्ता ब्यक्ति फेला परेमा तत्काल कानून बमोजिम कारवाही गर्ने ।
५– टिकट शुल्क, पार्किङ शुल्क तथा मनोरञ्जन शुल्क उठाउने कार्यको सुक्ष्म निगरानी राखी अनियमित हुन नदिने ।
६– आयोजक, पत्रकार महासंघ तथा अपाङ्ग प्रवद्र्धन समाजलाई प्राप्त हुने आम्दानी असुलीको सुनिश्चितता गर्ने, गराउने ।
७– मेलाको समय बेलुकी ७ बजेसम्म कायम गरी सात बजे पश्च्यात पुर्णतः बन्द गर्ने, गराउने ।
८– नेपाल कानून बमोजिम लाग्ने मनोरञ्जन कर लगायत प्रशासनिक शुल्क अनिवार्य रुपमा असुल उपर गर्ने, गराउने ।
